من كد ما جمالك شاغل الناس
ضافته الوزارة اعله اليدرسون
ومن كد ما صعب محد نجح بيك
النجح بشفايفك راسب بالعيون
ومن دون المناهج ترك ما بيك
اذا اترك فراغ يعني انه مجنون
وصدكني اليوصفك جذب اعليك
لان انته الوحيد الما الك لون
تعال وشوف لمن امتحن بيك
يوكف علي اكثر من مراقب
اغافلهم واحاول انقل اعليك
واجي بنص السنه وهم انه راسب
علم شفايفك مو بس كتابين
انجمع بيهن علم كل المكاتب
وبجفوفي من الزمك الزم اخيال
بس الكه الشهد بجفوفي ذايب
من تمشي لرحلتك كوة تنشاف
وغشاوة تصير بعيون المراقب
يجي الاستاذ يسال عل اليغيبون
يكله استاذ بس هندو غايب
واجي انه اخر السنه وجابولي تعريف
وكالو بالسؤال تعرف افلان
اكلهم رمشه عود وجفنه زرياب
اذا يطبك جفونه يطلع الحان
وصوتك ينزرع بين التصاوير
وتضل الصورة تحجي بهيئة انسان
و وجناتك جهنم بيها تعذيب
لكن تختلف ما بيها دخان
وخصرك ينحسب بالسنتيمترات
واذا يطلع غلط تختل الاوزان
وطولك بيه خلك كل الفلاليح
اذا بحرنه بيه انشوف بستان
وبعد كل هذا الوصف كلت اطلع اكمال
اطلعت ماخذ صفر وحسابي غلطان
ونعم اعترف ما جاوبت بيك
ولو يطلع نيوتن يبقى حيران